Curs da perfecziunament

Tgi che paussa, fa ruina. Tgi che sa perfecziunescha, profitescha: d’experientschas, da responsabladad e da pussaivladads da far carriera.

«I n’è betg impurtant da prevair il futur, igl è impurtant d’esser preparà per quel.» Quai saveva gia il Grec Perikles enturn 450 avant Cristus. Da ses temp èn vegnids construids ils pli renumads edifizis ad Athen.

La Societad grischuna dals impressaris constructurs è preparada per il futur. Perquai che ses commembers sa perfecziuneschan cuntinuadamain. La Societad svizra dals impressaris constructurs dispona perquai aposta d’in center da scolaziun e porscha numerus curs. Meds d’instrucziun e publicaziuns pon ins er empustar gist qua.