Professions en il sectur da Construcziun

Miradur/a AFQ
practicist/a da construcziun AFP

En la construcziun auta bajegias ti edifizis novs e gidas a mantegnair la valur da las ovras da construcziun. Era sanar e restaurar èn incumbensas impurtantas da tai e da tes team.

Construider/construidra da vias AFQ
practicist/a da construcziun da vias AFP

Mintga giada che ti mettas il pe davant l’isch dovras ti ina via. Sco constructur da vias procuras ti che la rait da vias svizra cun ina lunghezza da passa 70’000 kilometers saja segira.

Sondader/sondadra AFQ
practicist/practicista per lavurs da fundament AFP

Sco sondader vegns ti en funcziun, avant che las lavurs da construcziun sco talas cumenzan. Ti procuras numnadamain ch’il fundament, sin il qual vegnan construids pli tard ils edifizis u las vias da traffic, saja stabil e segir.

Construider/-dra da palantschieus industrials e purtants AFQ
practicist/a da construcziun da palantschieus industrials e purtants AFP

Sco constructur da palantschieus industrials e da basa construeschas e mantegnas ti palantschieus purtants e funds. Quels fas ti per exempel en hallas da fabrica, magasins u en edifizis publics.

Montader/montadra da binaris AFQ
practicist/a per montar binaris AFP

Sco montader da binaris procuras ti che nus possian viagiar a moda segira e cumadaivla cun il tren, ma era cun il tram u las pendicularas. La Svizra ha cun passa 5000 kilometers ina da las raits da binaris las pli spessas e las pli frequentadas dal mund.

Salaschader / salaschadra

Ina citad veglia senza salaschada? Nunimaginabel. Ils craps da salaschada dattan ad in lieu in scharm particular. Betg mo ad ina citad veglia. Sco salaschader u salaschadra embelleschas ti era plazzas davant chasas, parcs, curtins u vias.

Lavurer / lavurera da betun AFQ

Sco lavurer da betun prefabritgeschas ti elements da betun e blers ulteriurs products da betun per ils pli differents champs d’applicaziun. L’emprim creeschas ti furmas negativas da lain tenor ils plans da construcziun da l’incumbensader. E ti emprendas co applitgar correctamain furmas prefabritgadas dad atschal, da material sintetic ubain da betun.

Lavurer da crappa / lavurera da crappa

Crappa natirala è e resta in material da construcziun prezius, multifar e popular. Per elavurar la crappa natirala dovri persunas dal fatg cun ina buna furmaziun. Lavurer u lavurera da crappa è ina professiun cun avegnir.

Tagliacrappa

Baselgias, doms, catedralas e fossas: ils pli gronds e vegls edifizis e monuments sacrals che nus enconuschain èn construids cun crappa. L’art e la cultura sa reflecteschan en els. La lavur dal tagliacrappa è ina part essenziala da questas ovras.

Sculptur da crappa / sculptura da crappa

Sculpturs e sculpturas da crappa elavuran la crappa natirala a craps e plattas da fossas, funtaunas, monuments, figuras e relievs, ornaments da fatschadas ed ovras d’art. La creaziun artistica stat en il center.

Lavurant / lavuranta al tagl d'edifizi AFQ

Dapertut nua ch’i vegn construì u renovà dovri averturas en il betun ed en ils mirs. Quellas vegnan fatgas dals lavurants al tagl d’edifizi. Ti lavuras cun maschinas tecnicamain fitg sviluppadas sco in chirurg da construcziun. Tes guaffen il pli impurtant è l’utensil a diamant. Ti foras, resgias, taglias, smatgas e sfratgas betun e mirs.